جاسم غرد الدلال المرحوم الحاج حمزه الزغير
السلام على الحسين وعلى اولاد الحسين وعلى اصحاب الحسين ابدا مابقيت وبقي الليل والنهار
جاسم غرد الدلال المرحوم الحاج حمزه الزغير
للشاعر : عزيز الگلگاوي الكربلائي
جاسم غرد الدلال هاك اسمع تغاريده
يذكرك بالوفه وهاليوم الوفه حلت مواعيده
جاسم فرحتي ومفتاح كلبي وسر امانيه
ماضاع السهر وياك ماضاع لياليه
ماضاع الثدي الغذاك ماضاعت مراميه
اريدك ساعه تصغي لي وتشوف شعندي من نيه
اريدك تعرف شمطلوب وتحلل معانيه
اريدك تلتزم بالسيف واريد تعيد ماضيه
يامصباح گلبي ارتاح يانغمة اناشيده
_________________
جاسم ياامل گلبي سمعت گلبي ومضامينه
العرفت شمگصده وشيريد منك حسب تمكينه
صاحبتك سنين سنين والايام تنطوينه
وجنت مسودنه بهواك واتحدت امانينه
واحنه الشوك والنسمات تاخذنه وترد بينه
كبرنه وكبرت الايام واخضرت مراعينه
يامصباح گلبي ارتاح يانغمة اناشيده
____________________
تحديت الزمان برباك وصرعته بقوة الايمان
وبدروب العقيده مشيت وانته المشيتي عنوان
وعلى مهدك حنيت ضلوع وانته الروح والوجدان
اشوف الحسن لو شفتك اشوفك والگلب فرحان
وبنيت امال فوك امال واغذيك بثدي الاحسان
ونورك نور الدنيه ياوردة هاشم وعدنان
يامصباح گلبي ارتاح يانغمة اناشيده
___________________
بوجودك ضميري ارتاح ياشمعة التضوي لي
ما ساهرت لجل رباك يالسهرك هدم حيلي
جنت اطوي نهار الليل وافرح من يجي ليلي
احب ليل السمر وياك بداية عمر تحجي لي
احب كل لفظه اسمعهه واحب نغمة تراتيلي
وعله ذراع الحنان تنام يردد وانته تصغي لي
يامصباح كلبي ارتاح يانغمة اناشيده
____________________
يجاسم والليالي تدور واحنه ندور وياهه
يجي ليل وليالي تروح ونتمشه عله ممشاهه
نودعهه وتودعنه ونتهنه بمزاياهه
وشمعة ناظري ومعناي ريح الكدر طفاهه
حرمني من الحسين دهري وهدم بيتي وتعداهه
ومصايب صابت الدلال من اشوفك جنت اسلاهه
يامصباح كلبي ارتاح يانغمة اناشيده
_____________________
عگب عين الحسن ظليت اجاهد والوفه بجهدي
واريد اليوم بيه ترتاح وتسر براحتك جبدي
وانور لك طريق الخير وبيه تسير من بعدي
وتذخر صفحة التاريخ وتبني مجدك ومجدي
لكيت اللي تريده الروحلكيت بكصدك وكصدي
لكيت السعد والتوفيق والحظ خيمو عندي
طريق الغانمه مفتوح وينور بسماء الدين
اقدم اقدم عله الموت واتبع سنة الماضين
بنوا صرح المجد بالسيف جسبو راحة الدارين
طيب المرضع بايمان كلبك والامل بحسين
خلد بالدهر ذكراك يالذكرك حياة الدين
____________________________
