يالنايم عله العلكمي من نومتك كوم المرحوم الحاج حمزه الزغير
يالنايم عله العلكمي من نومتك كوم
المرحوم الحاج حمزه الزغير
للشاعر الاديب :كاظم منظور الكربلائي
__________________
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
هالله هالله شلون وگفه وگفت الحره العقيله
گابلت شاطي الفرات وصاحت بونه ثجيله
يعباس الضعن هذا رد يودعك ياچفيله
ويخبرك شصار وسدر من طحت مرمي عله النهر
ونصاب الحسين بحجر
والسهم مرد دليله
فرهود صاحو بالخيم من عگبك الگوم
يهنالك النوم وظليت انه بهاي الحرم حايره ومحتاره
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
________________________
ريت سيف الگص يمينك گص يبو فاضل يميني
والعمود الفضخ راسك حال مابينك وبيني
نشف مني الدمع جفني من سنه جمرة حنيني
وحگ چفك والعلم عگبك علي بيتي انهدم
الله من صوت السهم من عينك فگس عيني
يالصوبوا عينك سهم والسهم مسموم
يهنالك النوم
من عينك يفور الدمه ومن عيني يتجاره
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
________________________
يعباس شلون وليه بولية عداك نولينه
حرم والخيل ادهشتنه وحرگوا خيمنه علينه
نار فوك النار شبت بالضماير وانسبينه
نار المخيم والضمه وصاحت ودايع فاطمه
لا ظل خدر لا ظل حمه
گوم ياحامي الضعينه
نارين صارت بالگلب تتواگد اليوم
يهنالك النوم جمر الضمه ونار المخيم چملت ناري
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
________________________
يالعليك الخوه فرضت تسبح بدم الحميه
فرضت عليه الكفاله ومضت بيهه الغاضريه
واكفلت عگبك خواتك وشگفت عنهن بديه
لاچن الحاله اتغيرت وبيوت اهلنه اتهدمت
عگبك والعيال انسبت وانه اديت العليه
بين الاخو وبين الاخت لازم وملزوم
يهنالك النوم
وهرش الگلب من ينمرد تتغير اثماره
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
________________________
يعباس شلون حيره اتحيرت وانگطع گلبي
وظل يحوم عله الشريعه وعيني عله الخيم تربي
طحت يصبي البصيره وبيش اوچد بعد دربي
نصين دلالي انجسم مابينك وبين الخيم
ياخذلك اخبار الحرم يالطحت بسهام عتبي
عباس ظل بمصرعك گلب اختك يحوم
يهنالك النوم
ويسدر لخدر الحرم ياخذلك اخباره
يالنايم عله العلگمي من نومتك گوم
يهنالك النوم ماتگعد تسوي لعليلك والحرم چاره
________________________
