جاوب يليل 2021

وكأنَّ العبَّاسَ يُخاطبُ سوادَ الليل ..
متسائلًا عن اختهِ العقيلةِ زينب عليها السلام
التي حملت آلام كلّ الشهداء، ورسالة كلّ الأنبياء
في اليوم الذي و اروها الثرى وشيعتها دموع الثكالى


قصيدة جاوب يليل 2021
كلمات: الشاعر خليل آل اسماعيل

أداء
الرادود ميسرة التاروتي
الراود السيد جلال الموسوي
الرادود علي حمادة

التسجيل و المكساج: ستوديو الشعائر
الكورال: علي القبيطي و علي أحمد
إخراج: حسن العوامي

التصوير:
حسن العوامي
حسن آل أمان
حسن يعقوب

الرعاية الإعلامية: شبكة صوتيات ومرئيات الشيعة
شكر خاص: لجنة عشاق الحسين عليه السلام بصفوى


يُهدى ثواب هذا العمل إلى:
الحاج عبدالغني اخضـر " أبو حسين "
الحاج عبدالله القديحي " أبو نوفل "



كلمات القصيدة:

ياظلام الليل إختي أم العفاف
بالله جاوب گلي عنّ احوالها؟

إدفنوها لو بَعَد؟ .. جاوب يليل
اتأكدو زينب عليها ارمالها؟

شيعوها؟..هذي ستر الله الجليل
جبرئيل ابنفسه لابُد شالها

بالله طمئني النعش شافته ناس؟
آنا اْخاف اتشوف عين اخيالها

آنا عبّاس الأخو ونوماسي هاي
لا يكون إني متِتْ حسبالها!

غيرتي الهاي الوگِت مثل البخور
وهاي عطري الما يفارگ شالها

آنا چنْت أمسح جدمها امن التراب
وأگطع أي چف لو تعدّه وطالها

آنا أغضب عالشمس لمّن أشوف
ترسم ابجرأتها شكْل اظلالها

اسأل ومن عين وحده أبچي ظيم
وماكو چف تمسح دموع آجالها

منها شِفْت اعتاب؟ .. أو ذِكْرَت عضيد
كان لو تبچي بچي اتعنالها

زينب أعرفها ودهرها اشگد جحود
لا ارتياح ولا فرح خلّالها

زينب التزرع أمل عند اليئوس
وبس مِتِت ضاعت جميع آمالها

ماكو من جسّدها بس عرفوها زين
المصايب جسّدت تمثالها

هاي خيتي فنها بس نوح ووداع
تضحك ودمع الجِفِن يختالها

هاي يوم الّي مشت واحنا ابتراب
بِچَت اعليها ابحزن عذّالها

طيبه ما تكسر گلُب .. تدري يليل
أختي مكسوره تجرّ اذيالها

هيّه ماتت كِل حلمها تستريح
وتنسى دنيا .. تروح عن غربالها

حتى باخر نفس البيها وتموت
ابعيني واچفوفي نطگ چتالها

ايگلها وين احسين عنچ والغيور؟
وگام ايذكرها ابثگل أغلالها

زينب الدار العزيزة وكلها نور
والبقى ابهليوم بس اطلالها

ما أطوّل بعد ما ظلّت دموع
وعيني شبعت كافي كلّ النالها

بس مجرّد طمئنه ايجوز أستريح
وانتَ جاوب گلّي عنّ احوالها

ابچفن غطوها؟ .. شيعها الملاك؟
اتأكدو زينب عليها ارمالها

ومن گبل متموت يا ليل .. السؤال
طَرَت اسمي وبعدي باقي ابالها؟