كل شيء منها | محمد بوجبارة

أداء الملا : محمد بوجبارة
كلمات الشاعر: علي البحراني
-
ذكرى استشهاد السيدة خديجة
عليها السلام - 1445هـ
-
حسينية السبطين | الطرف
-
مخطوطة - السيد حيدر البراهيم
ترجمة - حسن القطري
‎مكساج - حسن المرهون
مونتاج - رحمه حسين
إدارة المتابعة - محمد عبدرب الرسول
إدارة الإنتاج - محمود السلطان
-

-
إنتاج:بوجبارة ميديا
1445 هـ - 2024 م

~~~~~~~~~~~~~~~~~~~~~~~


كل شي منها، وبيها أسرار السما
الما عرفها اشلون يعرف فاطمه!
الله أنزلها گبل قرآنه آيه
وللفضايل والمجد صارت بدايه
كل شي منها

-١-
رحمه عاللي انگال عنّه ((رحمةً للعالمين))
سبْگت الكل ابفضلها عن جداره وعن يقين
واهيا للإيمان أمّ، وصارت أم المؤمنين
ابحيث لو ماكو خديجه، الدين ما يتسمّى دِين

من ضواها ظلمة الجهْل انمحت
واهيا للإسلام حواء أصبحت!
من سلالتها الطهاره والهدايه
وللفضايل والمجد صارت بدايه
كل شي منها

-٢-
فاطمه ليلة قدر وأم فاطمه تبگى النهار
حضره قدسيه ويقينا بالعرش إلها مزار
من تسبّح ينفتح للجنه والدنيا مسار
والله من منزل خديجه الغار من حگه يغار

هالعقيده مُبغض البيها يشك
الخادم ابمنزلها أعلى امن الملِك
إلها مديونه تظل كل البرايا
وللفضايل والمجد صارت بدايه
كل شي منها

-٣-
من أجل عين الديانه قِبلت اتبات ابحصير
قدّمت كل اللي عدها وحاشى ما گالت كثير
تفتخر بيها الأيمّه وچانت اتوالي الأمير
علّمت هالناس بس المو موالي ايظل فقير

المال عدها حب نبينا المؤتمن
بالمقابل حصّلت أم الحسن!
الرب يحبها وجابت الكوثر كفايه
وللفضايل والمجد صارت بدايه
كل شي منها

-٤-
للصفات الجوهريه صارت الحره وعاء
باختصار اهيا الألف والباء بحروف الهجاء
واهيا باب الأنبياء وأمهات الأنبياء
من كمالات اللي بيها اتكمّلت باقي النساء

مريم العذراء بالحرّه اقتدت
يوم صاحت "يا خديجه" واولدت
لنها تسبيح العلا وكنز الخفايا
وللفضايل والمجد صارت بدايه
كل شي منها

-٥-
جبرئيل ازداد هيبه ومنها نال أعظم مقام
لنّه چان ايسلّم اعليها ويِبلّغها السلام
سلِّم اعليها يشيعي وردّد ابحب هالكلام
ألسلام اعله خديجه ابعدد أنفاس الأنام

ألسلام اعله العفيفه الطاهره
ألسلام اعله الشكوره الصابره
ألسلام اعله الوفت حتى النهايه
وللفضايل والمجد صارت بدايه
كل شي منها

_______________